舊年8月，內地兩大電訊商聯通（762）與中電信（728）互調董事長，王曉初噚日首次以董事長身份主持聯通業績會。王曉初可遊走於兩大電訊商之間，非等閒之輩，噚日有人問佢𠵱家點睇舊公司中電信，佢即刻耍太極。
王曉初噚日獨挑大樑，半小時嘅答問環節，佢一個人應付晒，旁邊嘅首席財務官李福申同總裁陸益民可以剝花生。
對於傳媒一開波就歡迎佢由中電信「過檔」聯通，王曉初笑住點頭，不過，問佢𠵱家點睇舊公司中電信，佢就話唔方便再講。
咁就當然喇，雖然佢最清楚中電信嘅狀況，但係之前係點都關佢事，佢講舊公司壞處，變相都係話自己之前管理有問題，當然要耍太極喇。佢又講定先，叫投資者畀一年時間佢，去改善聯通盈利表現，控制埋大家對公司嘅預期㖭，果然高手。