現代傳播（072）獲央視前主播加盟。公司旗下現代數碼副總裁蔣璐陽噚日首次見傳媒，靚太一名，原來佢仲做過央視主播。
呢位靚太笑言，當年自己係傳媒童工，16歲就喺重慶電視台做主播。佢憶述，當時電視台招募主播，老師叫佢去試，佢就着媽媽嘅衫，報大兩歲，當拎經驗。
點知成功過五關斬六將，佢最尾向電視台澄清未夠秤，但電視台仍然收佢做主播。
佢一邊做主播，一邊讀書，高考後去咗北京讀中國傳媒大學，入埋央視做實習，主持財經節目。佢話，當時連牛、熊都唔識分，之後又去美國進修，畢業回國去央視做節目主持。離開傳媒行業之後，做過投行、拍賣行等等，認真多瓣數，最近仲加入埋上市公司㖭。
所以話呢，世事真係如棋。