邊個係NBA人生贏家？勇士後衞史堤芬居里（Stephen Curry）肯定有份。周一正值28歲生日嘅居里，聽完囡囡拉莉cute爆唱生日歌後，順風順水幫勇士主場以125:107擊敗塘鵝。
居里上季拎完MVP，又幫勇士重奪總冠軍，到今季勇士都係西岸一哥，佢翻冧MVP當然係大熱。事業得意之外，佢家庭都好美滿，同太太艾爾莎、兩個囡囡樂也融融，其中大囡拉莉仲好鬼得意，不時喺場邊上鏡搶晒老竇風頭。周一比賽前夕，居里就同屋企人食蛋糕慶祝，拉莉唱生日歌𠱁到老竇鬼咁開心。
人逢喜事精神爽，甲骨文球場今場不時傳來生日歌聲，居里喺呢個「生日會」下領軍，勇士無驚無險順利大勝18分；居里第三節完結前一球超遠三分，全場貢獻27分同五助攻。勇士賽後以60勝六負繼續排聯盟榜首，只係用咗66場就拎到60勝，打破聯盟紀錄，而主場跨季連勝亦去到49場。對於生日願望，居里就話：「其實我仲有好多進步空間，我永遠唔會自滿，希望未來更強大。」
