35歲嘅鄭智（圖）日前落選國足大軍名單，佢噚日同傳媒講，會以平常心面對，暫時專注幫廣州恒大比賽，但佢冇講到會唔會考慮退出國家隊。恒大今日踢亞冠盃，而鄭智就喺噚日出席賽前記招，記者都好關心佢落選國家隊嘅事，鄭智表示自己嘅心情冇受影響，「2011年嗰陣我都冇入選，仲以為國家隊生涯就咁玩完，但後嚟又入番。我家陣只係想踢好亞冠盃分組賽，冇入選國家隊唔會影響我嘅心情。同埋即使冇份入選，我亦真心希望國家隊可以喺之後嘅比賽贏波。」
有傳鄭智仲想趁機退出埋國家隊，但可能在場記者冇追問啩，唔見鄭智有講。國足日前公佈咗24人大軍名單，備戰月尾嘅兩場世盃外，佢哋基本上要贏晒先有機會做到其中一支最佳次名出線。國足會先喺主場對馬爾代夫，再鬥已經肯定首名出線嘅榜首卡塔爾。
喺國足球員入面，相信鄭智係最為人熟識嘅一個，因為佢以前喺英國踢過波；同埋佢不嬲都好有爭議性，好似喺上年中港大戰後，港足門將葉鴻輝話鄭智喺比賽中鬧佢係狗，而鄭智就堅決否認，呢件事仲係羅生門。