碧桂園（2007）主席楊國強近年鮮有在港露面，甚至乎公司一年兩次業績會都交由管理層主持就算，惟獨係舊年初內房股風聲鶴唳，個別老總被傳受查，楊總先至忽然現身，可能風浪已過，楊總噚日又no show了。
楊總舊年3月專登喺兩會期間請假到港主持業績會，今年，公關大員就話，楊總身兼全國政協委員，忙住喺北京參加兩會，所以難以抽身來港。佢強調，楊總「心繫公司」，開完會就會返工㗎喇。都啱嘅，𠵱家阿爺刺激樓市需求，務求去庫存，楊總留喺北京收風，攞第一手國策資料，當然緊要過來港見投資者喇，投資者應該明白啩。
其實，每次有碧桂園活動，大家都會問楊總去哪兒。內部人士總係話，楊總忙於工作，年過60都周圍去巡視業務，本月初就去咗馬來西亞睇公司項目，冇偷懶。