大家睇完「金句王」黎明（Leon）親自解說「核心內外圍」，係咪L.I.K.E爆先？唔夠喉？即刻睇埋下集啦，Leon仲會逐個評價三大天王，如果有得揀，究竟佢會揀邊個做大佬？又會揀邊個做生意拍檔？唔講咁多，睇片！
記者：譚倩宜 攝影：林德雄、陳志嵐、郭賢興
問：如果畀你揀郭富城、劉德華同張學友，畀你做哥哥、老闆或者生意拍檔，你會點揀，同埋點解？
答：揀生意拍檔梗係揀劉德華啦，哥哥揀學友啦，郭富城就冇可能揀佢做大佬嘅，你揀佢做細佬呢，佢咁活躍、咁好動，咁鍾意買跑車，要照顧佢好多，所以個比例你哋都知點分。
問：Leon，我想問你鍾唔鍾意食榴槤？
答：Wow, Wallace。榴槤我食過，但唔會食太多，因為好難消化。食完之後最好就遠離人群啦大佬，即上下兩個turbo噴氣會好臭。
問：你今次演唱會叫《Random Love Songs》，請問你最鍾意自己邊首love song？
答：冬天嘅話，其實我自己好鍾意《送你一瓣的雪花》，因為真係個冬天味道好濃
問：你會唔會自己揸車？通常會去邊呢？
答：0依家好少揸車，因為個腦太多嘢諗，費事揸車太分神嘅話會產生危險，所以0依家好少揸車。但都會間唔中揸吓。
問：黎明，點解今次唔喺紅館搞演唱會？
答：原因紅館一年先排期，所以公司同事啱啱知道，新海濱有個期可以自己搭，其實嗰時我連新海濱係咩都唔知。
問：黎明你對粉絲有啲咩要求？
答：支持我的粉絲，其實我唔係好想喺機場等我，因為你坐完長途機係最攰嘅時候、最煩躁嘅時候、又冇得沖涼嘅時候、最污糟邋遢嘅時候。其實你唔係好想見到人。
問：喺歐洲咁多個城市裏面，你最鍾意邊個城市？你有冇嚟過荷蘭呀？
答：好耐以前喺荷蘭開過演唱會。第一次我帶埋我爸爸去，我問佢點呀爸爸，好唔好？「阿仔，以後都唔好再叫我嚟咁遠嘅地方。」
問：Leon，你嚟緊個演唱會，啲歌迷可唔可以上台玩遊戲？
答：上台，唔知，可能隨時即興。但主要都係講個performance。一定會有唱歌、跳舞。一定要有，唔可以企喺度。
問：Leon，除咗水上活動，你仲鍾意啲咩運動？
答：水上運動我鍾意嘅，陸地嘅單車運動我都鍾意，適當嘅賽車，當然喺跑道裏面。打乒乓波我都OK，打羽毛球都OK。足球，我細個嘅時候守後衞好叻，但係大個咗已經唔記得咗。
問：Leon，你想做導演多啲定演員多啲？你想做咩角色？
答：其實如果接到好劇本，一定做演員最好。拍戲我都有試，我覺得睇際遇囉。我兩樣都未到最好，盡量做到最好。