唔少足球員喺唔使踢波嘅時候，都鍾意入賭場玩吓啤牌，禾夫斯堡前鋒麥斯古斯（圖）亦係其一，不過，據德國《圖片報》報道，呢名27歲嘅德國球員喺上年10月參加咗撲克世界系列賽，仲要贏咗六萬鎊（約69萬港元）現金，點知佢喺搭的士返歸時，啲錢留咗喺的士度，之後就算報埋警都搵唔番；而當呢件事近日通咗天之後，麥斯古斯就俾狼堡罰咗兩萬鎊，仲要俾球隊嘅體育總監K阿羅夫斯「照肺」，話佢影響球隊聲譽。麥斯古斯都算地獄黑仔王喇！