天王黎明（Leon）經常被指「金句王」，最近他活躍facebook，早前更上載一條在橫店揸車rap住講「鍾意就鍾意，唔鍾意就唔鍾意，唔好講咩L.I.K.E」的片hit爆網絡。而過往從未公開為其「金句」解畫的Leon，終於出現在《蘋果》的「人人問黎明」環節，想知「核心嘅外圍係核心嘅內圍」點解？Leon點可以做到「唔會空肚食早餐」？唔使估喇，Leon即時為你拆解，拆解同時Leon不忘再爆：「我都唔明點解我講嘅係『金句』唔係『銀句』。」
撰文：譚倩宜
Ｑ1）招小姐：「空肚食早餐」係點解㗎呢？
Leon：哎吔，其實有人誤會我，有人問過我「喂Leon，你唔會空肚食早餐咁嘅說話都講得出嚟呀！」我答佢梗係唔係啦！因為我每朝起身都會飲一杯熱水先開始食早餐，咁就唔算空肚啦，估唔到兩三個人嘅對話會演變到「唔會空肚食早餐」。
Q2）張先生：可唔可以講吓你每日三餐食啲乜？
Leon：呵呵！太好喇！我早餐食煮蛋，午飯先食菜，然後食麵，嗰日唔使太大量工作就可能只食魚就夠，晚飯有時牛扒同菜，有時唔使做嘢會食東坡肉加飯，但會好肥。
Q3）黎小姐：你覺得你邊句金句最金？
Leon：我冇金句將人跣到攤攤腰，所以冇「甘」唔「甘」。
Q4）梁先生：如果要你揀郭富城、劉德華同張學友，畀你做哥哥、老闆或者生意拍檔，你會點揀，同埋點解？
Leon：揀生意拍檔梗係揀劉德華啦，哥哥揀學友啦，郭富城就冇可能揀佢做大佬嘅，你揀佢做細佬呢，佢咁活躍、咁好動，咁鍾意買跑車，要照顧佢好多，所以個比例你哋都知點分。
Q5）方小姐：你有冇八達通㗎，平時用嚟「嘟」乜嘢多㗎？
Leon：八達通有好多種，我大又有細又有，連特別版都有，平時用嚟去戲院買熱狗、買爆谷同停車場，係呢三樣。
Q6）朱先生：我覺得你幾有喜劇細胞，會唔會拍多啲笑片？
Leon：喜劇細胞係冇得刻意，因為我唔係刻意咗但識得隱藏嘅人，所以喜劇嚟講，我覺得唔好再挑戰自己唔得嘅地方，除非真係緣份到，如果有一日我真係拍喜劇，老闆唔怕蝕，我會同你博一博，why not？任何嘢都要試吓，老闆就可能唔願意。
Q7）謝先生：「核心外圍係核心內圍」係點解㗎？
Leon：核心嘅內圍同核心嘅外圍，核心，我可以睇到佢嘅外圍，但外圍裏面一定有內圍，咁如果內圍裏面仲有小核心，你喺外邊鑽個窿入去睇嗰時，你依然會見到外圍，取決於嗰個核內有幾多個「核核」，而衍生幾多個外圍同內圍，清楚晒啦！
Q8）陸小姐：你會唔會自己揸車？通常會去邊呢？
Leon：𠵱家好少揸車，因為個腦太多嘢諗，費事揸車太分神嘅話會產生危險，所以𠵱家好少揸車，但都會間唔中揸吓。
Q9）黃伯伯：我已經退咗休，你覺得我仲有冇魅力？
Leon：大家都一樣吖，大家都戴帽，當然有魅力啦！同埋魅力係來自自己信心，你有信心又唔傷害人，你就有魅力。
Q10）何小姐：俾人話係金句王，你會唔會唔開心㗎？
Leon：如果唔開心有得選擇，咁算喇，唔開心根本冇得選擇，我開心畀你睇喇，其實我唔明白點解會有金句兩個字，點解唔叫銀句呢？
Q11）Yannes：如果你想講好鍾意，但又唔可以講L.I.K.E，咁仲可以講乜呀？
Leon：好似呢個女仔講L.I.K.E我就覺得好真誠，佢打破咗我對L.I.K.E嘅睇法，好似「喂，你like唔like」呢個字有恐嚇性同有威逼感覺。頭先嗰個女仔話L.I.K.E，再講like唔like，呢件事上就溫柔好多喇。L.I.K.E可以咁樣表達，但唔好講我like隻歌，我覺得怪怪哋，係嘛？鍾意就鍾意，Do you like it？
Q12）黃老太：點解今次唔喺紅館搞演唱會？
Leon：原因係紅館要一年前排期，公司同事啱啱知道新海濱有個期可以自己搭，其實嗰時我連新海濱係咩都唔知。
