時尚品牌要出新line唔容易，最快手當然係搵其他界別嘅專家玩聯乘，集兩家之大成，賣樣又賣功能。而時裝品牌同不同界別crossover的產品，好多時比時裝本身更吸引；到底呢幾件係衫？家品？定玩具？藝術品囉！
一、Fashion × 家品
芬蘭家品品牌Iittala最近同日牌Issey Miyake聯乘出家品，將潮女至愛嘅三宅一生褶皺融入餐墊、杯碟同餐巾等設計，亦繼續有手袋關照住照時裝迷，仲係BaoBao變奏的新褶皺，有象牙白、翡翠綠同岩石灰三色。
二、Fashion × 運動
運動早已是時裝一部份，見老佛爺率領的Chanel以至貼地至極嘅Zara都出運動風產品，就知sport chic當道。每年New Balance嘅合作對象真係手指加腳趾都數唔晒，上個月同新加坡女裝鞋牌P.V.S 合作設計996鞋款後，今次到美牌J. Crew，全港限量30對男裝New Balance 997以奶油糖為主題，配色近復古風，算易襯。
三、Fashion × 旅遊
非正式調查顯示，香港打工仔十個有九個身在公司，心在外遊。今季Columbia搵來日本迷彩圖案設計事務所iicamo(𥮳𥮳籼朥)合作，玩出幾款以美國奧勒岡州自然景色為靈感嘅新派迷彩印花。未有假出走？買住戶外風設計止住渴先囉。
四、Fashion × Pop Art
呢個組合確實老是常出現，奈何鬼才Jeremy Scott每次同唔同品牌交手都總有驚喜，叫人不得不望多兩眼。今年春夏佢同巴西鞋牌Melissa合作，首次設計膠鞋嘅Jeremy Scott以吹氣玩具為設計靈感，唔少鞋跟同搭帶上都加入玩具吹氣口，細緻得來玩味甚濃！
記者：黃樂雯
查詢：
（a）Iittala Eslite Spectrum（尖沙嘴梳士巴利道星光行Star Annex三樓L303號舖）
（b）J.Crew（中環安蘭街9號）
（c）Columbia（銅鑼灣時代廣場726號舖）
（d）Melissa（銅鑼灣時代廣場5樓506號舖）
