邊個做下季車路士主帥？相信已經明朗化，因為意大利國家隊主帥干地（圖）確認，佢今夏教埋歐國盃之後就會走人。英國傳媒話，佢好有機會去接軒迪克棒，做車仔領隊。另外，英足總秋後算賬，迪亞高哥斯達（DC）分分鐘停多兩三場。喺上周六對愛華頓場英足盃，DC頭頂巴利，兩黃一紅被逐，但佢唔肯離場，仲同球證嘈，所以被英足總檢控佢行為不檢；英足總仲要DC最遲喺周三解釋佢係咪對愛華頓球迷做不文手勢。英媒披露，DC成日被英足總告，搞到好唔開心，諗緊喺夏天離隊。