人如果冇夢想，同條鹹魚有咩分別！李斯特城周一喺英超獨腳戲，憑前鋒岡崎慎司一箭定江山擊敗紐卡素，榜首優勢去番五分，李城同領隊雲尼亞里離第一次頂級聯賽冠軍越嚟越近，雲帥賽後仲叫粉絲𠵱家可以發下冠軍夢嘞。
高僧發功岡崎拆「紐」
李斯特城周一全取三分，真係靠晒亞洲勢力，球會班主嚟自泰國，曼谷就有高僧發功幫李城祈福，日本國腳岡崎慎司就做功臣，25分鐘接應占美華迪頭槌二傳，好似足球小將咁第一時間凌空倒掛，幫李城先開紀錄。坦白講，越入聯賽尾聲，李城球員嘅壓力真係越嚟越大，其實呢幾場入球能力都開始下降，不過全場得岡崎慎司一腳中目標，就足夠以1:0贏波全取三分，真係完美戰果。
李城由1884年成立至今，都未拎過頂級聯賽冠軍，次級聯賽就贏過七次，包括2014年以英冠冠軍身份升班，唔好以為雲尼亞里64歲就大把冠軍，佢86年開始執教生涯，雖然都幫費倫天拿同華倫西亞等贏過盃賽，但實際都未贏過頂級聯賽冠軍，只幫費倫贏意乙、摩納哥贏法乙冠軍咁大把。
李城𠵱家又領先番次席嘅熱刺五分，英超得番八場聯賽，真係有機捧盃，雲帥賽後就話：「球迷可以夢想拎冠軍，我哋都希望繼續贏落去，𠵱家十分關鍵，但我哋好享受，只可以盡力而為。」愛隊上榜首，唔少李城球迷覺得光榮之餘仲贏大錢，之前就有球迷買中李城贏聖誕冠軍五鎊變5,000鎊。有位叫James Weller嘅球迷季初就下注10鎊，敲5,000倍嘅李城贏英超冠軍。不過賭波公司可能見勢色唔對，話肯𠵱家賠一半過佢，不過James就拒絕袋住先，堅持等季尾想拎足50,000鎊咁話。
肥賓不敗神話破滅
其實呢場波仲有另一個焦點，就係賓尼迪斯首度領紐卡素出戰，賓帥自2001年教華倫之後，教新球隊每場首戰都不敗，今次就俾紐卡素打爛齋砵，不過講真紐卡素呢場表現都有好轉，雲帥都話賓尼迪斯可以帶𠵱家喺尾二嘅紐記成功護級咁話。