馮仁昭四圍超：
脹爆齊昕伴母遊美睇星 - 馮仁昭

【爆相爆片】上年特首女梁齊昕出盡風頭，踏入新一年，齊昕好似冇晒蹤影，原來近呢幾個月，佢先後去咗澳洲、英國同美國旅行。噚日《蘋果》讀者陶小姐將前日影到齊昕同媽咪唐青儀去咗美國洛杉磯旅行嘅相透過本報「爆相爆片」開心share，見到齊昕同媽咪仲專登去咗當地著名嘅星光大道。

匆匆收線

有指齊昕情緒經常起伏，要keep住食藥，搞到有副作用致暴肥，相中齊昕的確肥咗成個碼，不過精神唔錯。至於行喺前面嘅阿媽，就拎住個膠袋，睇嚟兩母女啱啱shopping完。馮仁昭噚日越洋致電齊昕，問佢係咪同媽咪去咗美國散心，佢就話：「……唔，係……Sorry，我唔方便講！」然後就匆匆收線。
仲記得齊昕喺舊年萬聖節當街激摑阿媽震撼全城，事隔幾個月，兩母女俾人影到喺中環酒吧消遣，搭膊頭又蹺住手，母女果然冇隔夜仇。