東亞銀行（023）近期運勢麻麻，先受到美資對沖基金股東Elliott Capital狙擊，之後公佈業績又出現盈利倒退。東亞最新年報顯示，兩位太子爺李民橋與李民斌舊年竟然逆市加薪一倍，各袋年薪870萬元！
不過大家稍安毋躁，望真啲，兩位太子爺2014年8月頭先至加入東亞董事局，年報只係見到佢哋嗰年5個月嘅人工，所以相對基數低咗。公關話，佢哋舊年人工其實變動不大。反而阿爸，即係主席李國寶就減薪16%，應該係反映番自己表現啩。
Elliott一直批評東亞家族式營運唔多掂，又指李家長年管理不善，業績不佳，令股東對管理層喪失信心。今年銀行業前景亦差，東亞管理層之前喺業績會講過，今年透過凍結人手、整理內地分行網絡等手段減低成本，冇提人工點樣，家陣老闆帶頭減人工，唔知東亞員工點呢？