前日唔少網民好頭痕，紛紛諗緊特首梁振英出席國泰飛躍理想計劃典禮致辭時，自稱要講嘅爛gag其實係想噏乜？點解講完幾秒後都冇人識得笑？（陪笑嘅另計~）
終於，有人破解到呢個爛gag之謎，聽完之後，八方覺得好笑過原本嘅gag位！要解謎就先回帶睇一睇。梁振英前日致辭話喎，人類係陸上生活動物，身體構造唔容許我哋飛，大約係諸葛亮嗰個時代，雀仔飛過問：「諸葛先生你會飛嗎？」諸葛先生就代表人類立志話：「I can fly one day！」
致辭講「孔明先生」鋪排
當佢講完後，台下出現兩秒寂靜，然後CY自行打圓場話：「爛gag嚟㗎。」哦，原來如此，結果再過多三秒後，全場人士終於識得嘻嘻陪笑，當然包括CY自己。
查實，無啦啦點解會講到諸葛亮？真係令人不明所以！但有心水清網民發現，原來現場真係有位「諸葛亮」㗎，就係……國泰航空公司行政總裁朱國樑。睇到呢度仲唔明？如果話畀大家知，原來CY甫開腔致辭多謝各界人士時，就喺朱國樑先生之前，加上「孔明先生」稱號，原來，佢個爛gag喺致辭之初已經鋪排，係搞緊食字gag囉，相信係想讚賞國泰航空畀咗唔少年輕人衝上雲霄嘅經驗，啩！
可惜吖，在場冇人聽到、感受到、理解到呢個gag位；唔知在場嗰位國泰諸葛亮，當時識唔識得笑？
李八方
mailto:[email protected]