喺上周六阿布扎比亞洲帆船錦標賽，憑兩名里約奧運代表盧善琳同鄭俊樑擸走一金一銀嘅港隊噚日凱旋。首次喺女子RS:X組成為亞洲冠軍嘅善琳當然開心，話晒八月里奧都係參加同一項目，信心當然大增；至於喺男子RS:X組攞銀牌嘅俊樑，比賽中途試過兩場比賽偷步，噚日佢解釋係想試吓體能極限，以後起步會更進取，對攞到亞軍好滿意。兩人喺里奧前仲有下月法國世界盃同五月荷蘭歐巡賽可以練兵，六月就去里奧賽場適應環境。