財爺曾俊華噚日出席商台「在晴朗的一天搶收視」活動，欣賞C AllStar演繹佢喺預算案引用嘅《憑著愛》，大讚唱得好好聽，同時話原唱者蘇芮原汁原味。對於當日有記者將蘇芮讀成蘇丙，鬍鬚曾話自己當時「想笑囉」，活動主持陳志雲即刻話佢當時掩飾得幾好。
C AllStar問鬍鬚曾有乜夢想？佢話「問個咁大年紀嘅人夢想，好難有」，繼而話兒時想教劍同功夫，其後自讚：「預算案好有創意，但好多人唔覺我有創意咋嘛」，惹嚟台下發笑。被問到平日睇乜電視節目，佢話每朝6點都睇新聞；至於睇邊個台，佢話「有新聞嗰個台」，冷面笑匠又輕易令台下發笑。
陳志雲即席請鬍鬚曾揀歌鼓勵業界，鬍鬚曾話同事建議佢用陳百祥嘅《我至叻》，但佢認為麻麻哋，應用徐小鳳嘅《喜氣洋洋》，觀眾即時拍掌發笑：「因為《喜氣洋洋》已經係第7次、第8次創作，咁樣仲唔夠創意工業？」