阿仙奴走過九年無冠嘅歲月，喺2014年五月嘅英足盃決賽終於擊敗侯城捧盃，上季仲成功衞冕，以為今季可以三連霸啦，點知喺周日八強迎戰屈福特竟輸1:2而出局。佢哋早早喺英聯盃輸咗，目前喺英超又被榜首李斯特城拋離八分，而歐聯16強首回合鬥巴塞隆拿輸0:2，喺周三次回合作客嗰陣，仲恥辱性咁被足智彩開出受讓兩球嘅盤口，睇嚟兵工廠今季又要四大皆空喇！
輸畀屈福特又講金句
周日迎戰屈福特場波，兵工廠上半場真係踢得麻麻，要到下半場落後0:2先至醒番，但可惜最後都係輸1:2。賽後，領隊雲格梗係又成為眾矢之的，被球迷狂噓之餘，仲有唔少廠迷想佢「人頭落地」，但呢名法國籍名帥就話：「下一場波總會係大挑戰，而你就總會喺驚濤駭浪之中，坦白講，呢啲事已經變成鬧劇。阿仙奴之前試過，之後亦都會輸波，而最重要係我哋上下一心，保持信念，為下一場好好準備。」唔止咁，佢仲再次講金句㖭：「喺五月先嚟斷定我或者阿仙奴啦！」
睇到雲格苦瓜乾咁嘅口面接受訪問，我求大俠就不期然諗起喺今個月月底就會摺埋銅鑼灣分店嘅食肆「喜記」老闆，佢當年講出嘅反佔領金句「那有錢」個樣，真係同雲格好鬼似。雖然阿仙奴謹慎理財，真係大把錢，不過，雲格近年死都唔肯揮金買巨星級前鋒同中堅，每次被問到都係「那有錢」，難怪好多廠迷都好鬼不滿。
莊家睇死次回合等炒
雖然雲格死撐，但睇嚟兵工廠今季四大皆空嘅機會好大，喺聯賽就算榜首嘅李城失分，取代李城地位嘅可能係兵工廠同巿宿敵熱刺，而唔係阿仙奴自己。再者喺歐聯16強，佢哋首回合主場都落後巴塞兩球，周三嘅次回合要作客魯營球場，連莊家都唔睇好；足智彩竟然開出「讓球」阿仙奴受讓兩球嘅盤口，睇死佢哋冇得翻盤之餘，仲要被大炒㖭！就算係阿仙奴中場艾朗藍斯都同自己領隊唱反調，佢話：「人人都覺得阿仙奴今季捉到鹿唔識脫角！」唔知雲格仲可以撐到幾耐呢？