周日舉行嘅全英羽毛球公開賽，日本嘅奧原希望喺女單決賽以局數2:1擊敗中國球手王適嫻，職業生涯中首次喺呢項賽事封后。咁啱決賽當日仲係奧原希望21歲生日，呢個后冠相信係最好嘅生日禮物；佢賽後都好激動，話呢個係人生中最難忘嘅生日。喺決勝局打到17平手嗰陣，王適嫻被指拖延時間被罰紅牌直接輸一分；奧原希望就話只會專注自己嘅表現。