禮拜三谷草賽事用B欄，天文台預測有一兩陣雨，估計場地掛牌為好地。雖然谷B欄有「魔鬼跑道」之稱，不過今季魔性已失，以最近2月17日為例，當晚八匹頭馬全部守前四位入直路建功，其中「鼓浪飛星」、「開心駿馬」及「牛精叻仔」更加放頭入直路帶到贏馬，反得太後根本好難追，宜秤先具前速擺前走之馬匹。今戰列陣馬中，頭場「你同我定」上仗轉鄭廐初出即勝正是於2月17日跑谷B欄所得，贏完等番同一移欄再跑，有運抽得一檔可以再下一城。另外，七場「鑽石巨匠」兩次跑谷B欄獲一冠一亞，子彈快馬結合跑道形勢可坐位望贏。