等咗兩年，台灣天團五月天終於再嚟香港開騷！五月天今年5月20至6月1日喺紅館共開10場，打破前年7場紀錄，票價分為980、580及380蚊，平飛加咗100蚊，貴飛同中價飛冇加價，相信「信徒」最開心嘞。年年唱年年爆嘅五月天，前年紅館騷惹南亞裔同菲籍排隊黨聯軍，貴飛被喪炒到6,869蚊，五月天相隔一年再踏紅館，信用卡優先訂飛每人限買6張，門票仲未知幾時公開發售，唔止「信徒」引頸以待，炒飛黨都早有部署，網上有代購黨藉代購之名明目張膽炒飛，980蚊嘅代購價為1,200人仔，淘寶網有炒家將三種門票索價680蚊到1,380人仔，肯定再掀搶飛潮。
港開10場台迷呷醋
去年五月天傳因拒演維穩騷，結果攞唔到紅館檔期，令十年之約斷纜，今年5月再踏紅館，網民紛紛讚好，不過有人留言「請減少內部認購的門票，請認真處理黃牛黨、排隊黨等問題。」、「連開十場你們是要累死五月天嗎？阿信的嗓子連唱十天能不啞嗎？」甚至有台灣歌迷呷醋：「台北多久沒開演唱會了，香港一開10場，把台北五迷放在哪裏啊啊啊！」
撰文：馮仁昭
