體壇拾趣：
告別NY拜恩遭絕殺

周日湖人迎戰紐約人嘅NBA常規賽，係拜恩（Kobe Bryant）喺職業生涯中同安東尼（Carmelo Anthony）嘅最後一戰，可惜紐約人後衞卡達朗（Jose Calderon）喺最後0.2秒射入三分波，以90:87絕殺湖人，令拜恩憾別老對手。

今場攻入14分嘅拜恩，諗番起自己同安東尼喺2003年12月首次較量嘅情況，亦難免有啲欷歔：「我哋曾經交手無數次，一諗到今場係最後一次，就覺得好奇怪。」現任紐約人總裁、前任湖人教練「禪師」積遜（Phil Jackson），今場都特登重返史達普斯中心睇波；拜恩曾經喺禪師麾下五次奪冠，相信兩人喺對方心中都有好重要嘅位置。

守死安東尼難擋卡達朗

今場攞到「雙雙」26分12籃板嘅安東尼，賽後好激動咁話：「最後一次同呢位傳奇球員交手，真係令我百感交集。」佢仲話拜恩對自己嚟講唔只係對手，更係導師同兄弟：「籃球令我同Kobe認識，而我哋喺場外亦係朋友。」兩人喺2008同12年入選「夢幻隊」，為美國出戰奧運，自此亦變成好友。至於今場射入絕殺三分波嘅卡達朗，就話其實最後一擊應該係由安東尼出手，不過當時後者俾拜恩守死，所以自己先會出手。