新民主同盟立法會議員范國威近幾年農曆年都會落區幫街坊畫年畫，每次都好評如潮，皆因佢係美國三藩市美術學院學士畢業，藝術方面造藝唔使講！
八九六四政治覺醒
咖喱范1984年慈幼會伍少梅工業學校畢業後，曾經喺白英奇同正形設計學校讀過設計文憑，喺設計比賽勝出過，獲大型廣告公司招攬，有份幫張國榮設計唱片封套，亦試過為西武百貨嘅項目飛去東京公幹。佢其後想增值，1988年留學三藩市美術學院，但1989年六四事件令佢政治覺醒，投身海外民運，更加改變職志，1993年報讀三藩市州立大學政治學碩士。
「第一堂教political theory，嘩，真係唔知噏乜」，結果之後帶住錄音機上堂，落堂後再聽多次，佢話係名正言順錄音㗎，如果竊聽就用暖水壺啦！
佢話當時仲特別到Business School搵港生組織時事學會，討論香港時政。可能知道佢關心香港時政，咖喱范話2014年、有位教授輾轉搵同學聯絡佢，「佢話見到傘運，想問我有冇俾人拉」，真係窩心到暈！