31歲嘅皇家馬德里球星基斯坦奴朗拿奴（C朗、右圖左），上周領軍喺歐聯16強次回合主場2:0擊敗羅馬之後，原來走咗去同英國知名時裝店Topshop嘅太子女Chloe（右圖右）密會！Chloe近日喺社交網站，上載咗張同C朗面貼面嘅親密合照，而另一張相就影低C朗喺佢個煙盒同電話殼簽名，仲寫住「My Love Chloe」㖭（左圖）。可能C朗掛住媾女冇心機踢波，皇馬喺周日西甲作客好驚險先贏到拉斯彭馬斯2:1。