【本報訊】旺區多個舖位租值跌，80後老闆蘇卓（阿蘇）與3位朋友趁租金下跌，踩入尖東「藥坊街」插旗，以七折租金開設成人用品店創業，取代前租客同勝藥坊。阿蘇表示，不靠自由行，以本地客及海外旅客為目標客群，冀兩年收支平衡。
尖沙嘴好時中心向麼地道一連16間地舖，5個月前仍有7間藥坊，堪稱尖東藥坊街，但近月無論平日下午或周末下午，記者途經均見門市拍烏蠅。其中地下9號舖同勝藥坊率先離場，舖位300平方呎，月租6.2萬元，租約至今年4月才到期，但去年年底已提早退租。業主將舖位放租，叫租5萬元，最終以4.6萬元租出，減價8%，並比舊租平約26%。
差估署最新應課差餉估值為52.8萬元，較去年度43.8萬元，升20%；但綜合業界意見，署方數據滯後，且部份商戶過去選擇分紅方式，便宜抵租但須與業主分紅，估值未必反映實況。
顧客比例男七女三
新租客賣成人用品，店名「Juicy Peach」，老闆之一阿蘇是80後，與3位友人合資約60萬元創業，「業主好傾，唔會話好堅持，成個商討過程，明白我哋創業、後生仔，好想畀後生仔發揮空間，租金比前租客平咗」。
以往成人用品店隱藏樓上舖、商場角落、唐樓以至工廈，考察多個地區，「呢度（尖東）係最旺嘅地方，旺得嚟，唔會嘈，可能附近有時裝店、名店，（對面有酒店會否有關係？）都有啲」。他續稱：「揀呢度，貪呢度夠旺……我哋想將性融入生活，有別於一般性商店喺樓上、後巷等等，唔介意喺大街大巷開。」他指明顯看見自由行旅客數字下跌，故亦不以自由行客為對象，目標是本地客及海外旅客。
他稱目前客人本地客與外國旅客各佔一半，當中以年輕男女居多，「男女比例七三啦，七成係男，三成係女。後生女仔客唔少㗎，買啲按摩油，同埋女性少少嘅產品，例如陰肌鍛煉球。年齡分佈以35歲做分水嶺，都係一半半，人均消費300至500蚊」。經營一個月，雖未賺夠交租，但只是剛起步，「簽咗兩年死約，希望租約期內做到收支平衡啦！」
■記者陳家雄
