嚟咗近兩年，迪亞高哥斯達（DC）前日先拎咗佢加盟車路士後嘅第一面紅牌！喺上周六英足盃八強，車路士作客愛華頓，DC又做「惹火尤物」，同對手巴利「咬頸纏綿」，兩黃一紅被逐，而車仔以0:2輸波出局，睇怕呢季都四大皆空。
向球證吐口水又反V
愛華頓靠倒戈嘅盧卡古喺下半場梅開二度，淘汰咗車路士，但DC就搶晒佢鏡。一開波，DC就同巴利擦出怒火，左手摑向巴利塊面，右手前臂就鋤佢後腦，睇落係一套完美嘅打劫動作。踢到咁茅，DC喺11分鐘先拎一面黃牌；佢仲唔順氣，喺球證面前吐口水，好在吐唔中，否則就冇之後嘅故事。DC完半場同愛華頓球迷隔空對罵，仲做埋「反V手勢」。
當車仔落後到兩球後，DC要爆發嘞，可能佢忘不了上半場搞過嘅巴利，喺83分鐘又同巴利肉搏。DC搵個頭撞向巴利，之後放個頭喺巴利膊頭度，個嘴就喺人哋條頸度郁嚟郁去，疑似送咗隻「咖喱雞」畀巴利，遠睇佢兩個親密到好似情侶咁。雖然DC扮晒親熱，但球證睇得清楚，向佢出示第二面黃牌，逐佢出場。出名毛手毛腳、鍾意「抽水」嘅DC終於拎咗佢加盟車路士以來第一面紅牌，唔少網民都驚嘆DC之前原來咁「乾淨」，真係唔知話係佢演技好定英超啲球證有問題。
竟係英超第一次領紅
賽後車仔領隊軒迪克話見唔到件事，唔判斷DC有冇咬人，仲反指愛華頓球員成場撩㷫DC，「對手球員成場都追住DC，佢哋係冇犯規，但球證應該感受到比賽氣氛，要保護球員。」其後車仔出聲明話DC對侵犯巴利感後悔，但表明冇咬過人，加上當事人巴利亦話DC冇咬佢，相信佢應該只係頂吓人，冇真係咬落去。不過，英國傳媒話，英足總有機會就佢對球證同球迷嘅行為不檢秋後算賬，或會停多兩場。
另外，車仔已經喺今季所有盃賽出局，而且聯賽落後榜首李斯特城20分，今季都幾肯定四大皆空。
