般尼茅夫（圖）踏入三月之後脫胎換骨，佢哋上周六主場贏咗史雲斯3:2，喺三月踢咗三場聯賽都贏波，不經不覺已有38分，差兩分就到英超傳統護級成功嘅40分界線，就嚟上岸。呢場波入球梅花間竹，麥斯格拉度同祖舒亞京治分別為主隊兩度領先，而史雲斯就靠莫度巴路同基菲爾施古臣兩度追平。喺78分鐘，般尼茅夫就靠史堤夫曲克奠定勝局。同日另一場，修咸頓就有加斯安奴柏利梅開二度，作客贏咗史篤城2:1。