講到潮食，不得不提Tartine，Tartine係歐洲流行嘅open sandwich。上星期中午走去灣仔利東街幫襯新開嘅Le Pain Quotidien（解作每日麵包），咪以為佢來自法國，查實係1990年麵包師Alain Coumont喺比利時創辦嘅餐廳，家陣全球有超過230間分店，遍佈歐洲、中東等地，新近來港開店。
呢度裝潢的確好有歐洲feel，尤其係室外部份，感覺悠閒，可惜附近仲有工程做緊，總係聞到一陣陣燒焊味。而且呢個地舖冇洗手間，想去洗手間，就要行出餐廳，繞半個圈走入利東街，搵到商場電梯大堂（條街指示唔清晰），搭電梯落樓先搵到洗手間，都幾麻煩。
好在餐廳侍應熱心兼有禮，有位爆肌型仔侍應仲會不時同客人打招呼，問吓食物質素如何，幫餐廳加番些少分數。而呢度嘅食物質素的確唔錯，試咗水牛芝士加意大利火腿Tartine（128元），麵包上塗上一層味道濃郁嘅黑橄欖醬，生色不少。不過下次再去一定要求坐室內。