話明係1000米直路賽，即是唔使轉彎，呢種賽事對上陣經驗相對較少的見習生而言，通常較易適應，贏馬亦相對較易。
這天田草第三場跑四班1000米直路賽，女見習生蔣嘉琦(阿Kei)接手苗廐「快寶駒」，馬本身已經出名快，仲要配嘉琦減十磅至115磅上陣，自然走唔過落飛黨法眼，結果呢匹7.4倍重飛綠燈馬，好似裝咗摩打咁，沿住外欄一放到底，大勝逾兩身位，取得季內第二捷，連帶蔣嘉琦與苗禮德馬房，首次合作即告贏馬，亦係阿Kei在港首度為外籍練馬師建功，組合獨贏開A2並派26元正。
呢場唔單止開「快寶駒」綠燈WIN，仲開埋啡燈Q，「快寶駒」搭亞軍吳廐「聖驛善」Ｑ成為落飛黨狙擊目標，連贏水瓜打狗唔見咗一大截，跑完得番32倍，此場落飛黨在Ｗ、Ｑ彩池扣本後，淨贏逾1,800萬元之多。
今場三、四名分別為次熱「金沙鑽」及大熱「港林飛魚」，四重彩派二萬三千幾。