【本報訊】獲得基金在職人士自我增值獎的幸敬陽現年43歲，20年前他大專畢業，慢慢攀上跨國電子企業管理層，與妻女過着安穩生活。但為追夢，他由零開始轉至需體力勞動的樹藝業，外人讚他勇氣可嘉，他卻說：「其實未必想像中咁困難。」
投入職場17年，幸敬陽工作滿足感漸降，「每日開會做決定，比較沉悶」。眼見家中經濟環境尚可，熱愛戶外活動的他3年前大膽跳出舒適圈，轉行樹藝業，到嘉道理農場任職身水身汗的一級工人。任性決定，太太是否無條件支持？他笑說：「都唔係冇條件㗎，我其中一半資產係歸佢名下。」太太只着他決定前想清楚，沒太多阻撓。
追夢非一帆風順，他灰心過：「（樹藝業）唔係外界講咁吸引，呢個係現實情況。除咗人工，還因樹藝師工作量少，有時只係淋吓水、掃吓葉、除吓草，覺得做嘅嘢有啲低下。」身份高低只在乎心態，他突破心理關口，加入嘉道理兩個月已能辨認逾百種植物，更於入職5個月升三級成督導員。他進修樹木相關課程，「希望全港見到嘅植物都講得出個名！」他準備參加註冊樹藝師考試，並計劃設網站教人辨別樹木。
■記者蕭洛汶