體壇拾趣：
見證馬刺反吸港fans抵番晒

上周六NBA常規賽上演西岸大戰，西岸二哥馬刺憑尼納特（Kawhi Leonard）嘅出色表現，以93:85反勝西岸第三嘅雷霆，將主場跨季連勝延續至41場。

雖然雷霆主將杜蘭特（Kevin Durant）轟入全場最高28分，都難阻球隊喺完第三節領先兩分之下輸波；雷霆今季22場敗仗中，有12場都係第四節俾對手逆轉，係今季NBA嘅「反輸王」。而今場攻入26分嘅尼納特賽後表示：「對手係邊隊都唔緊要，我哋只需好好執行戰術，落力防守，盡力爭勝。」今場有兩位來自香港嘅真．馬刺迷，特登飛去聖安東尼奧睇波，佢哋仲自製打氣紙牌，寫住：「為咗睇馬刺，飛咗8,000哩都值得！」更重要嘅係，佢哋睇到偶像鄧肯（Tim Duncan）正選上陣，仲攞到11分㖭。