世事無絕對！這天三T頭兩關都開冷Q冷T，殺咗唔少過關纜，勢估唔到尾關第六場，居然開大熱連贏。
第六場四班草地1200米，姚本輝馬房「迫擊炮」贏完再出仲有3.2倍，結果在莫雷拉胯下再下一城，組合獨贏開A1派15.5元。雷神跑完上半場已經憑「好好機會」、「駿馬名駒」、「迫擊炮」中三元。
反觀上次輸畀「迫擊炮」而今次受讓三磅配潘頓的「好人好事」，再一次被「迫擊炮」技術性擊倒，「好人好事」拉士雖然一度走甩，但完全頂唔住「迫擊炮」衝擊繼續做二奶，出道三戰清一色亞軍，仲未識得贏馬，呢條翻版連贏熱到4.4倍，比上次5.2倍仲要少。
「迫擊炮」今場負131重磅，直路初一度困守內欄，塞到連馬頭都被撞歪幾次，不過去到最後200米，當前面馬匹散開，此駒一望空，即以自動波殺上，雷神撳住不推不鞭，雙手零動作，對手卻騎到甩轆，「迫擊炮」像散步般行過對手，贏馬姿態極度誇張，四歲馬勇熟程度又跨前一步，出道七戰兩冠一亞兩季一殿一第五。
今場三、四名分別為「常拼常勝」同「帶寶來」，四重彩派6,158元。三T最終有人中正獎，每注派857萬幾。