禮賓府噚日開放畀公眾賞花，但天色整日陰沉有雨，入場人數冇以往咁多，但都有唔少示威者成功突圍，各施奇招表達訴求。
女長毛雷玉蓮帶咗把黃遮兼陶瓷小白象入場，佢話小白象係諷刺政府硬推多項大白象工程，相反醫院病床卻嚴重不足，佢通過安檢內進後舉起黃遮，高叫「梁振英下台」，場內警察樂隊隨即演奏強勁樂曲蓋過蓮姐聲浪，而被逐離場前，蓮姐仲將小白象掟碎。
因爭取真普選而自願被捕嘅黃伯夫妻檔，喺花園展示黃色「我要真普選」毛巾，俾工作人員話係示威物品，黃伯隨即好醒目咁將毛巾掛頸當頸巾。佢話遊園除咗賞花，亦要求梁振英兌現選舉承諾咪走數。
內地人排頭位想見CY
有兩名市民亦喺花園手持米字旗遮，最初冇人干涉，但當佢哋展示標語話中國政府違反《中英聯合聲明》，就俾工作人員指佢哋違反場地規則，要求離開。市民梁小姐花咗3,000蚊買咗套全身連帽嘅古典英國裙到場，佢話純粹襯番禮賓府，唔係示威喎。
當然啦，都有人專程去禮賓府賞花嘅，八方見到排頭位嘅大部份係內地人，佢哋話係賞花兼想同梁振英見面喎。CY噚日都喺朝早同晏晝現身，都有市民同佢握手嘅！
李八方
mailto:[email protected]