上月先攞到里約奧運代表香港嘅資格，23歲嘅香港滑浪風帆女將盧善琳（Sonia）就急不及待要證明自己！Sonia噚日喺阿布扎比亞洲帆船錦標賽最後一日獎牌賽，以第一名完成兼喺女子RS:X組奪冠，賽後佢話：「好開心贏到我第一個亞洲賽冠軍，同埋睇到我喺細風環境下有唔少進步。」
鄭俊樑收復偷步失地摘銀
黑黑實實嘅Sonia，七歲參加咗兩日滑浪風帆暑期訓練班後，就愛不釋手。佢話自己一向鍾意陽光與海灘，加上風帆呢個玩意好特別，中三索性轉讀夜校，日頭接受全職訓練，夜晚就返學校讀書，讀完中六投入全職訓練，難怪可以喺里約奧運資格賽擊敗隊友陳晞文，攞到港隊唯一嘅女子RS:X組參賽權。Sonia又話從返夜校嗰日開始，參加奧運已經係自己嘅夢想，今次將會以亞洲一姐身份出戰里奧。
男子組方面，里奧代表鄭俊樑今次都算抹一把冷汗，呢位2010年青奧銀牌得主喺男子RS:X組前八場比賽試過兩次偷步，扣咗好多分，好彩其間贏到兩場第一、四場第二先至力挽狂瀾。佢噚日喺獎牌賽攞到亞軍，最後總排名第二位，冠軍就由南韓選手Cho Wonwoo奪得。香港風帆隊會喺今朝返港，稍作休息就會專心備戰八月里約奧運；代理總教練陳敬然話，佢哋會提早兩個月，大約六月嗰陣就會全隊飛去里約熱內盧奧運賽場作衝刺練習。