美斯（箭嘴示）破盡球壇紀錄，可能佢都覺得入波入到悶，連唔入波嘅紀錄都要挑戰埋。巴塞隆拿喺上周六西甲贏波唔係咩奇事，收起蘇亞雷斯都喺主場大炒基達菲6:0，繼續喺榜首領先八分一樣係見怪不怪；亮點係巴塞又射失12碼，今季已經第八次射失，刷新咗西甲球季單季射失12碼紀錄。至於呢場波處理極刑宴客嘅美斯，亦係佢喺巴塞第八次射失，超越咗前輩伊度奧，成為巴塞球會歷來射失次數最多嘅球員，不過美斯喺比賽入咗球靚波加貢獻三次助攻，乜都補番晒數。