【本報訊】去年港大開學禮，時任學生會會長馮敬恩致辭，提及70年前有港大生加入抗日義勇軍，在香港保衞戰中捐軀。他呼籲新生繼承前人信念，為港大打贏自由之戰（war of freedom）。過去一年，自稱「爛命一條」的馮敬恩在戰場上「博盡」，甚至押上前途，至上月卸任會長一職，港大「重光」之日卻遙遙無期。他難掩失落，但未曾言敗，「一日未end game，都未知輸贏。我後面嘅人會跟住一齊去撼動強權，直到有一日佢倒塌」。
斥李國章「無恥第一」
馮敬恩去年7月底與同學衝進校委會會議廳，看見校委李國章在笑，此幕在港大創校百年以來堪稱經典，「嗰吓覺得好sad。無恥至此，佢都算係第一」。部份校委嘴臉令他覺悟，道德感召並不適用於無恥之徒，「同無恥到盡嘅人鬥，要喺同一水平同佢作戰」。
他開記招大爆校委反對任命陳文敏為副校長的荒誕語錄，外界反應兩極，有家長在他面前對小孩說：「呢個就係大話精喇。」有陌生大叔向他擲牙籤他都不在乎，只堅持對同學負責。在擁有社會名望的校委面前，他自覺有戰略優勢，「我可以大多佢哋一樣嘢：無所畏懼。我只係一個廿幾歲𡃁仔，有乜可以輸？」。他眼中的「勇武」是美國黑人民權領袖Malcolm X所指「By any means necessary」（任何必要手段），包括押上前途，「撼動到政權嘅東西都嘗試去做，而你知道同願意付出呢個代價」。
1月底的圍堵行動換來校長馬斐森「暴民管治」（mob rule）的指摘。馮上月底拒簽確保校委安全承諾書，校委逐他離場，「我會話畀馬斐森聽，呢啲先係mob rule。唔係多人贊成就係啱，仲要諗價值，呢啲價值就係我希望守住嘅最後道德底線」。
連場搏鬥過後，贏了甚麼？馮坦言，只喚醒部份港大生關注大學條例，「（同學）失望就一定有，嘩，做咗好多嘢，諗住可以救港大……（但）同學唔會袖手旁觀，政權咁做必然要付出代價」。大學生活不過4、5年光景，轉眼即逝，但他深信港大人都珍視母校的百年光輝與榮耀。主修中文的他引述孟子經典：「言不必信，行不必果，惟義所在」，「即使有幾多成本都好，我覺得做咗件啱嘅事。同學唔願意平白消費前人留落嚟嘅光輝，我哋需要每一屆嘅人，嘗試撼動強權」。
■記者白琳