聞說香港男士對日本都有份獨特情意結，不過相信源自日本嘅白色情人節（3月14日）就真係令人頭都大埋，皆因通常喺情人節（2月14日）收到禮物嘅男士，都會喺3月14日回禮。雖則呢個節日擺明同消費脫不了關係，但每次都送花、飾物同朱古力等例牌三寶未免太冇新意，不如花多少少心機同手力，親手整份禮物仲有心思。
本地手作皮革工作室JK Collection由2013年起開始教授製作皮革玫瑰花，今次大學生Alec親身上陣整皮革玫瑰畀女朋友，原來只要肯花時間，製作過程其實唔難。
做法：
1.先預備好所需皮革材料，包括共17塊裁成平底貝殼形的皮革作「花瓣」，浸軟3小時至可塑形。3小時後，取出「花瓣」，輕輕用手搓揉塑形，等候約約2小時至皮革乾透。
2.在裁成葉子狀的皮革上壓上收禮者名字。
3.用幼身鐵絲捲成約8至9吋長度花莖，並貼上雙面膠紙，把幼身皮帶向上包裹，中間加進葉子。
4.把塑形後的「花瓣」用熱熔膠槍貼在花莖頂端，成玫瑰花狀。
5.在玫瑰花底部貼上裁成小葉子狀的托底皮革。
6.用貂鼠油為玫瑰花拋光，待乾即成。
查詢：JK Collection
九龍長沙灣永康街41號匯華工廠大廈1樓C22室
記者：黃樂雯
攝影：潘志恆