麥卡倫終被炒，賓尼迪斯上周五正式成為紐卡素領隊，新官上任三把火，肥賓一到埗就即操！記得堅尼亞喺08/09球季半途執教紐記嗰陣，上任後即畀球員放兩日假，最後紐記嗰季降班，至於呢次肥賓吸取教訓，上任後個半鐘，就叫齊班放緊假嘅球員返嚟操練，備戰禮拜一作客李斯特城嘅英超。肥賓同紐記簽約三年，據報每年人工有400萬鎊（約4,460萬港元）；若果紐記降班，佢就可以自由身離隊。