不敗身被破！東方噚日喺旺角場迎戰季內三度成為手下敗將嘅冠忠南區，結果連失兩球，錄今季聯賽首敗，賽後雖然仍領先傑志一分，但只少踢一場咋！
牛丸：希望忘記呢場
南區主帥鄭兆聰老竇鄭國根近日返咗香港，今場都有捧場。11分鐘，南區先靠一次反擊由陸志豪接應基奧傳中射入，呢位倒戈兵都好尊重舊會，入波冇慶祝。28分鐘，蘇沙喺30碼外一腳收死咗葉鴻輝，幫南區領先到2:0。前線球員發威，守龍嘅謝德謙都有出色表現，佢接連救出勞高、李康廉同基奧雲尼嘅攻門，球球都係靚救。下半場東方換入美亞加強攻力，但隨住基奧雲尼同勞高連番失機，最後東方以0:2輸波，今季聯賽首敗。東方教練陳婉婷（牛丸）賽後話：「上半場後防有啲唔集中，下半場發揮幾好，好多機會，不過欠運同把握力。球隊士氣影響唔大，希望忘記呢場，嚟緊周中仲有對香港飛馬嘅補賽。」佢又認為，迪高受傷始終有影響，因為差個夠硬淨嘅球員。南區中場陸志豪就話，希望今年聯賽爭到三、四位。
南華又失分今赴馬代
東方輸波，南華同日亦失分，佢哋喺斧山道作客灝天黃大仙，雖然有賴恩格菲斯頭槌先開紀錄，但下半場俾安達扳平，兩隊以1:1賽和。南華足主張廣勇賽後話球隊已經有改善，贏唔到係唔夠運啫。南華今日起程到馬爾代夫作客馬茲亞，張廣勇話目前要放眼亞協盃，所以呢場會加贏波獎金，贏嘅話每人有4,000蚊，每入多球就多2,000蚊，不設上限喎。
至於今日都有兩場聯賽，標準流浪兩點半喺深水埗運動場作客夢想駿其；元朗五點半就會喺元朗大球場擺陣迎香港飛馬；兩場波票價都係60蚊，另設長者及學生票20蚊。