勇士大報復發生！今季NBA常規賽只係輸過畀六隊波嘅勇士，上周五再遇其中一支擊敗過佢哋嘅球隊拓荒者，就梗係要狠狠地報仇雪恥啦，結果勇士順利以128:112勝出，累積58勝6負，挑戰公牛紀錄又邁進一步，史堤芬居里（Stephen Curry）累積射入超過1,500個三分波，成NBA第25人。
拓荒者喺上月主場以137:105大勝勇士，係勇士今季最大敗仗，呢支上季冠軍回師主場當然還以顏色，第一節已經拋離40:27，最終大炒16分。勇士浪花兄弟K湯遜（Klay Thompson）同居里分別攻入37及34分，居里射入七球三分後，職業生涯已經累積超過1,500球，成為NBA歷來第25位達到呢個紀錄嘅球員。勇士順利贏波，主場29場全勝，距離公牛72勝常規賽紀錄亦越嚟越近。