雖然依家只係三月，不過已經有唔少女士開始為夏天做準備而要節食減肥，有網民就搵嚟韓國女星嘅減肥餐單，發現個個餐單都會有蕃薯。
「國民初戀」秀智初出道時都有過一段水腫期，不過依家就越嚟越瘦，據知佢減肥時早餐食雞胸肉同一個蕃薯，午餐食玄米飯同沙律，晚餐就蕃薯兩個，主要靠食蕃薯去水腫。出名身材健美嘅女團SISTAR成員昭宥就早餐一個蕃薯、午餐三隻雞蛋及一塊麵包，晚餐就三塊紫菜包飯。
另外成功減重70磅嘅女歌手朴寶藍，佢就早餐食蕃茄、雞胸肉同蕃薯，午餐食凱撒沙律及一杯低脂牛奶，晚餐只食三粒核桃同兩隻雞蛋。