正所謂患難見真情，要知道一個女人係咪真的愛你，可以睇吓佢肯唔肯同你捱劏房。你知啦，家陣樓價租金高企，調整嗰少少都唔知係咪虛火，上唔到公屋又無父母幹的香港人，要安居真係難過登天。
Greg剛剛成功向Joanna示愛，正式開始愛情長跑，兩人用六千蚊租了深水埗劏房同居。「我計過數喇，就算慳慳哋，每人每日返工淨計食飯搭車至少兩舊，扣埋家用……我哋一個月應該儲到七千蚊，五年之後就夠首期買樓喇」一開波，好有planning的Joanna已經精打細算咁限住Greg每日嘅使費，仲叫佢唔好隨便課金、去旅行，假期就去行山跑步，遠離酒肉朋友兼戒煙。「不過，𠵱家樓價租金都咁貴，點儲錢都冇用啦！況且𠵱家無全民退保，我點都要留一筆錢養父母」，Greg拿着他的粟米石斑飯苦笑。
「咁……不如我哋買劏房住，價錢平，買到新樓，又有私人空間。」Joanna抱着Greg，「我知你好偉大，處處為我着想，不過𠵱家好多劏房新盤放得床就放唔到櫃，露台同隔籬大廈面壁，廁所又無窗，仲要得個廚櫃仔，你唔覺得好屈就？」Greg再望着某地產博客的新盤相集嘆氣。「當然屈就，你知我好鍾意煮飯，又鍾意招呼朋友。不過好多人置業都係由細價樓開始，越換越大，然後收租養埋屋企。為咗你，一齊捱幾年有乜所謂？」Greg聽着Joanna的耳語，會心微笑，因為他知道，即使香港再差，還有一個肯捱劏房的女人在他身邊，一切都變得有希望。
地產小子
http://propertykids.blogspot.hk/