因為參選區議會而吸納咗唔少本土年輕fans嘅青年新政游蕙禎，大前日上咗網台「花生台」做節目，同白鴿黨區議員區諾軒、傘兵葉錦龍，以及一位教授大談「hehe」腐女文化，但估唔到都出事，惹嚟熱血同部份本土派圍剿。
游︰只此一次
其實游蕙禎喺節目入面，主要分享咗對中國歷史人物的hehe聯想，尾段談及少少政治，點知節目出街後，蕙禎BB俾唔少本土派同黃毓民支持者網上圍攻，認為佢唔應該上呢個佢哋視為「左膠」嘅網台做節目，話對蕙禎BB今次做法「極度失望」，甚至有人叫佢要公開道歉。
亦有網民對蕙禎BB受靶睇唔過眼，質疑被唔少本土派視為「教主」嘅黃毓民上TVB講波、上亞視把酒當歌、係咪都要票債票償？又指過去唔少毓民忠心教徒，包括熱血公民黃洋達、鄭松泰等人，都曾接受過佢哋口中嘅CCTVB訪問，咁佢哋係咪又要道歉？
八方噚日搵到蕙禎BB，問佢點睇呢單嘢，佢話其實已喺一個網台節目解釋過，出席花生台節目主要係因為識得其中一個教授主持，蕙禎BB仲話，呢位教授上年已邀請佢上花生台，今次純粹還人情，強調「只此一次」。對於部份網民圍攻，游蕙禎就大方表示唔覺委屈，話可以理解喎。
李八方
mailto:[email protected]