紐卡素𠵱家以28戰24分排英超尾二，足智彩嘅降班賠率仲熱到得1.57倍。佢哋差成咁，皆因主帥麥卡倫領導無方，結果呢位54歲領隊亦喺周五俾喜鵲炒魷魚，隨即執行李走人。英國傳媒話前利物浦同皇家馬德里教頭賓尼迪斯周五朝早飛咗去英國同紐卡素傾，將會簽一份年薪400萬鎊（約4,400萬港元）嘅三年合約，仲即刻領軍踢下周一訪榜首李斯特城嘅聯賽。