噚日喺修頓上演嘅籃球銀牌負方組賽事，永倫有主力泰那下半場着晒火，最終以90:72擊敗表現回勇嘅福建，可以繼續角逐呢項殊榮，輸波嘅福建就要等聯賽開季先有波打喇。今場波兩隊打得緊湊，首仗大敗畀南青嘅福建有司徒偉傑表現出色，半場已經攻入14分，帶領球隊僅僅落後33:40，第三節仲一度追到50:53；不過，上半場只得三分進賬嘅泰那，下半場開始發力，最終攻入全場最高26分，帶領永倫贏波。同日晉龍以82:59大炒遊協晉級。