湖人當家球星拜恩（Kobe Bryant）喺周四迎戰騎士嘅常規賽，雖然呢位37歲老將打出超水準表現，可惜湖人最終以108:120輸波，令佢同勒邦占士（LeBron James）最後一次嘅交手留下一絲遺憾。
占士：希望每晚同佢較量
拜恩今場16投11中攻入26分，68.8%嘅命中率都係近五季之中最高。雖然唔少人都覺得拜恩同占士係宿敵，但Kobe就唔係咁諗：「我哋唔係宿敵。我同占士實在太似喇，我從未覺得自己同另一個人可以咁似。」兩人喺聯盟嘅經歷又真係有唔少相似之處：視「籃球之神」米高佐敦（Michael Jordan）為偶像、都係高中生球員，又係得分好手。事實上，拜恩有唔少得分紀錄，都係俾占士打破（見附表）。
拜恩喺第一節有球低位背框進攻「fake」起占士得分，更令球迷大叫精采；攞到24分嘅占士都話：「我希望每晚都可以同佢較量；可以同其中一位史上最強嘅球員交手，係一件值得感恩嘅事。」其實占士都好唔捨得拜恩呢位老對手，佢之前都講過未曾喺總決賽同後者交手，係一個遺憾；過去九屆，拜恩喺08至10年帶領湖人殺入總決賽，而占士就喺07、11至15年分別為騎士同熱火出戰總決賽，可惜從未碰頭。至於同樣轟入全場最高26分嘅K艾榮（Kyrie Irving）都話：「同拜恩喺史達普斯中心球場最後一次交手，對我嚟講極具意義，我會好好記住呢場比賽。」
