沙田賽事近期成為蔡約翰的主戰場，數數手指，蔡廐已連續十次田戰有馬贏，而且近五次皆有新勝馬取得連捷，今戰蔡廐參戰馬中，僅得「魔連奴」屬新勝馬，以馬房喜歡乘勝追擊之作風，此駒值得作為捧場對象。
「魔連奴」上仗回配莫雷拉即首度征服三班，取得今季第二場頭馬，今次雖然莫雷拉放手唔騎，不過睇番蔡廐近兩匹由莫雷拉贏完再出換人之「精算博奕」及「首飾太陽」均非冠即亞，故此「魔連奴」縱使換人亦不能睇小。另外，蔡廐田戰十連勝，當中六次贏兩場或以上，今次配合起孖極有可能是「精算追擊」及「鑽之友」，兩駒均出王牌報跑四班賽，觀乎蔡廐二月至今九匹打王牌報跑四班之馬匹，取得六冠兩亞一殿佳績，以上兩駒今次均跑番唯一贏馬路程，既有王牌在身，已露出擊手影。