喺輿論界，曼聯領隊雲高爾有個死亡循環，有段時間佢會帶到欣欣向榮，但轉個頭就連輸幾場，被史高斯、里奧費迪南等名宿插爆，魔迷紛紛懇求摩連奴接手。紅魔周四喺歐霸盃16強首回合，作客輸畀利物浦0:2，雲帥又跌入地獄，同時摩佬親口確認今夏會返新工，好大機會係入主奧脫福。
早排曼聯四連勝，雲高爾由喺被炒嘅懸崖邊，返番去穩坐帥位，好似雲達沙呢啲名宿仲一片唱好。不過，我求大俠好清醒，已經摸熟晒呢個規律；就好似股市上落市咁，見頂就要回落。果然，輸完畀西布朗後，紅魔再喺歐霸盃不敵利物浦，雲帥上任後首次輸畀紅軍。呢場曼聯稱得上係完敗，進攻冇力，防守派膠，幾乎全場捱打。20分鐘，迪比禁區內拉跌尼達利基尼輸12碼，史杜列治射入；73分鐘，卡域克解圍唔湯唔水，拉爾拉拿助攻羅拔圖法明奴射成2:0完場。另外，傷癒復出嘅費蘭尼仲輸波輸品，鏡頭影到佢完場前開踭打中安利簡恩，話唔定被秋後算賬。
史高斯：得個亂字
英國嗰邊搵咗三位名宿講呢場波，利物浦嘅麥馬拿文笑晒，而曼聯嘅史高斯同里奧費迪南狂鬧隊波。里奧話：「呢班曼聯球員千祈唔好喺球迷面前行過，唔係實被人鬧死！最恐怖嘅係，我見唔到班球員有改善。」史高斯就話：「曼聯得個亂字。今場我哋同利物浦最大嘅分別，係人哋有清晰踢法，我哋就唔知做緊乜。」網上嘅魔迷仲直接，叫雲高爾快啲執包袱走人。睇嚟曼聯高層都聽到球迷嘅願望，摩連奴接手呢單料雖然傳極都未變真，但就越嚟越似，英國《曼徹斯特晚報》指，摩佬接受電視台訪問嗰陣自爆搵到新工，嚟緊七月就會履新。雖然佢冇話教邊隊，但外界都估係曼聯，希望摩連奴接手之後，曼聯球迷唔使再經歷呢個循環啦。