禮拜日沙田八草兩泥賽事，草地用最狹窄之C加3跑道作賽，睇番最近2月14日同一移欄賽事，形勢大利前置馬，除了「華恩庭」後上建功之外，其餘頭馬都係守於前四位入直路勝出，留得太後好難追，宜秤先具前速守好位之馬匹。
今戰列陣馬中，九場「魔連奴」上仗正是於2月14日田C加3欄掄元，而且歷來三次角逐此移欄獲兩冠一亞未失Q，等番強項再上陣可添食。另外，六場「明多多」跑田C加3欄1200米一次即勝，亦係全場唯一贏過此移欄之參戰馬，憑較佳場地性能可重開勝門。
至於兩場泥地都係跑1650米，上月至今四場同程，分別有「合拍飛龍」、「你好馬」及「故事」放頭贏馬，四場「你好馬」及八場「軍火」等擅跑此程之快馬可優先留意。