在電影《鴨王》有露點演出的袁嘉敏（Candy），自從和老外男友Kenneth拍拖後索性收起性感，叠埋心水等嫁做少奶奶，不過近日她為了一件事嬲嬲豬，最後更要報警求助。事緣去年5月開始，Candy朋友圈中在深夜時分收到一個自稱是「Candy」的電話WhatsApp，內容除了𢱑撈叫朋友介紹工作給她做之外，還有大量三級露骨內容。為了以正視聽，Candy前日在微博公開騙子電話號碼，希望身邊朋友不要受騙。
陳爽險中招
記者昨日致電身在內地拍戲的原裝Candy，她語帶無奈地說：「呢件事纏擾咗我大半年，所以早排我決定去中環警署報警，因為呢個騙子越講越離譜，每日三更半夜冒認我發WhatsApp畀我啲朋友，講嘅嘢又三級、又低俗同下賤，一時話我𠵱家喺夜店飲酒媾緊仔，一時又話我𠵱家出咗埠因為有老細包緊我，仲叫我嘅朋友介紹老細畀我識，最搞笑仲話我會做儍事自殺，嚇死我啲朋友！」
Candy透露這段時間，有不少朋友都中招，更險些應假Candy出來見面。她說：「阿爽（陳爽）有次爭啲出咗去，不過佢覺得有啲奇怪，因為識我嘅人知我好少飲酒，所以就打番電話畀我，問我究竟發生乜嘢事！」Candy表示警方暫時未拉到人，但就希望今次公開事件後，能嚇退該名騙徒，不再出來招搖撞騙。
採訪：王梓嫚