運動當然有益健康，但特首提議喺中環ifc對開設泳棚，畀打工仔午飯後極速游水，就得到無數劣評，連本身係游泳健將、形象健康嘅會德豐（020）主席吳宗權都唔多buy，話自己只係喺星期六、日先至游水。
吳宗權噚日主持會德豐業績會，佢出名熱愛游水，又係「公益金會德豐百萬泳」嘅活動籌委會主席，華華當然要捉住佢問喇。一問佢會唔會去泳棚游水，佢都忍唔住笑咗出來，將因為業績會而繃緊嘅臉部肌肉，全部放鬆晒，跟住佢爆咗句，話只喺周六、日游水，曲線ban咗特首呢個咁有創意嘅建議喇。
其實稍為有common sense，都知道呢個食晏時間游水嘅建議唔可行喇，先唔講時間匆忙，維港海水污糟成咁，特首跳落去游兩個圈先講吧。